Kontinent ili more, u čemu različite su zore?

Dajana Dragičević: Kontinent ili more, u čemu različite su zore?

Kako? Kako ću reć ćaći da gren ča…iz ove blagodati, iz ove lipote? Zora je, a u konolu modri se more, doje ko da će na buru. Zroci blidega sunca sjajidu priko konola na Mosor i Biokovo. Pasalo je pol dvanajestega i Božić je na vrota. Vrime za bogove, ča bi rekli naši stori. Pogled mi biži u dajinu, leti di se pari da kraja nimo i somo naziren Čiovo i Šoltu. Čujen more! Ćutin njegov vonj. Čujen kako grli škrape i tiho meju kajiće zalepeće se onako meškinavo, ko dite koje pruža ručice i grli blaženo svoju mat. Kako, ma kako ću jo mlajen bratu špjegat da partijen i ko zno ča me tamo čeko. Brž i tamo spidu zore, prostirone plavon koluron mora moga kraja i svoda nebeskog, arije pune. U prsiman mi je veli grop. U grlo mi zastaje ovo bokun sinciere kafe ča je s nog, na kamenoj teraci, pijen. Neće mi sprobit. Gledon, tići su se inkaštrali u grone ovih velih bobicih, čapojedu zolnje slolke njihove plode. Grone od visoke, đentilaste polme plešedu na jutarnjen vitriću, ko duge vlosi mlode divojke. Ma vajo po ča. Tamo di rika teče, di jema zemje, a ne somo stinje…di jema areplana, otelih, neboderih, u grod. Di se ne triboš tragelat za do doma po ko zno kojen vrimenu. Tamo di ne triboš krunicu molit ako te nevera na more ćapo. Dušon ostajen, tilon partijen, gren, putujen. Škoj, more i čelesto nebo, galebi ča za brodiman letidu. Bit ću jelna od onih ča žive meju tonobiliman, atobusiman, ferotiman. Brž ću zaboravit od kamenih ploč napravjene sive krove storih kuć. More bit da se neću spominjat kogulih po kalan ča hi je jednih i drugih sve manje u mojen mistu. Bože moj, oću li ćutit u nidriman jubov svojih drogih i lipe vonje ditinsva mojega? Oće li me pratit miris bora, tamarisa, česmine, masline i loze…vonj kaduje, ruzmarina? Oću indir okusit onaku lipu spizu, tek parićonu ka iz kužine moje none, zlotno uje iz nonotove konobe? Oće mi vatra s komina nidir drugdi bit jača nego ova s ćaćinog? Moj zeleni škoj…Znon, digod bila bit će s menon, jerbo mogu jo poć sa škoja ća, ali škoj nikad neće poć iz mene.

 

                                                                      Dajana Dragičević, 3. razred

                                                                                                                                            SŠ Brač – Supetar

                                                                      mentorica: Rina Vidović, prof.

Svaki cent je itekako značajan!
Donirajte Udrugu Mlada pera

Odgovori